Joke 4 Everyone! :: February

យល់ស្ថានភាព

February 23, 2007

ក្មេងប្រុសម្នាក់រត់ចូលទៅស្នងការប៉ូលីសទាំងតក់ក្រហល់ ។

ក្មេងប្រុស : "ពូប៉ូលីស!! មានមនុស្សមួយក្រុមកំពុងតែវាយគ្នា!!"
ប៉ូលីស : "មនុស្សធំ ឬក៏កូនក្មេង? វាយតាំងពីអង្កាល់?"

"សុទ្ធតែមនុស្សធំ ពួកគាត់វាយតាំងពីកន្លះម៉ោងមុនឯណោះ…" ក្មេងប្រុសតប ។

ប៉ូលីសបន្ទោសក្មេង : "ចុះយូរហើយម៉េចក៏មិនមកប្រាប់??"
ក្មេងប្រុសតប : "មកពីមុនដំបូង ប៉ាខ្ញុំគ្នាពីរនាក់វាយគេម្នាក់ តែអម្បាញ់មិញស្រាប់តែគ្នាគេបួននាក់ទៀតរត់មកជួយ…" ។

ដកស្រង់ពី ៖ មហាសំណើច

ស្រីពេជ្រញ៉ាំទឹករួចទុកកែវចោលនៅកណ្ដាលផ្ទះ ហើយទៅអង្គុយមើលទូរទស្សន៍ធ្វើព្រងើយ ។ ម៉ាក់ស្រីពេជ្រ ដើរមិនប្រយ័ត្នក៏ទាត់ចំកែវឡើងបែកខ្ទេចខ្ទី… "យីសនាងនេះ! ផឹកទឹករួចមិនចេះយកកែវទុកដាក់ឱ្យត្រឹមត្រូវ អញទ្រាំមិនបានឥឡូវហើយ… យកអំបោសមកកើបចេញឱ្យឆាប់!" ម៉ាក់ស្រីពេជ្រស្រែកបន្ទោស ។ មួយសប្ដាហ៍ក្រោយ ម៉ាក់ស្រីពេជ្រញ៉ាំទឹកហើយ ភ្លេចខ្លួនក៏ទុកកែវចោលនៅកណ្ដាលផ្ទះវិញម្ដង ។ លើកនេះស្រីពេជ្រដើរមិនប្រយ័ត្នក៏ទាត់ចំកែវឡើងបែកខ្ទេចខ្ទី… ឃើញភ្លាមម៉ាក់ស្រីពេជ្រស្រែក : "យីសនាងនេះ ភ្នែកប៉ុនភ្នែកដើរមិនចេះមើលទេហ្អេ៎!! អញទ្រាំមិនបានឥឡូវហើយ… យកអំបោសមក កើបចេញឱ្យឆាប់!"

ដកស្រង់ពី ៖ មហាសំណើច

ណាត់ជួបលើកដំបូង

February 19, 2007

សិទ្ធបានស្គាល់នារីម្នាក់ឈ្មោះចិន្ដាតាមរយៈ SMS ។ ពួកគេទាំងពីរផ្ញើសារទៅមកជាមួយគ្នារាល់រាត្រី ។ ថ្ងៃមួយ ទាំងពីរអ្នកបានណាត់ទៅជួបគ្នានៅហាងកាហ្វេមួយដើម្បីស្គាល់មុខគ្នា ។ មុននឹងជួប សិទ្ធបានផ្ដាំឱ្យមិត្តសម្លាញ់គេឱ្យទូរស័ព្ទមកគេក្រោយពេល ២០ នាទី ដោយគ្រោងទុកមុនថាបើសិនជាចិន្ដាមិនស្អាត គេនឹងអាចរកលេះចេញមកមុន ។ ពេលទៅដល់ហាងកាហ្វេ សិទ្ធឃើញថាចិន្ដាគឺជានារីម្នាក់ ស្រស់ស្អាតរម្យទម ។ គេក៏ប្រញាប់បិទទូរស័ព្ទចោលដើម្បីកុំឱ្យមិត្តសម្លាញ់គេ Call មកនាំតែរំខាន ។ ផ្ទុយទៅវិញ អង្គុយសំណេះសំណាលមិនទាន់បាន ១០ នាទីផង ទូរស័ព្ទចិន្ដាក៏រោទ៍… និយាយទូរស័ព្ទរួច នាងក៏ ប្រាប់សិទ្ធថានាងមានការត្រូវប្រញាប់ចេញទៅមុនជាបន្ទាន់!!

ដកស្រង់ពី ៖ មហាសំណើច

តម្លៃជីវិត

February 17, 2007

ម៉ោងតែងសេចក្ដី លោកគ្រូបានដាក់ប្រធានបទមួយគឺ "តម្លៃជីវិត" ដើម្បីអោយសិស្សតែង ។ មានសិស្សម្នាក់ក្នុងចំណោមសិស្សទាំងអស់ ដែលជីវភាពក្នុងគ្រួសាររបស់សិស្សនោះប្រកបមុខរបរលក់គ្រឿងសមុទ្រ ។ សិស្សនោះបានសរសេរថា ៖ - ត្រីរស់ ១គ.ក្រ=៥០ ៛, - ត្រីងាប់ ១គ.ក្រ=២០ ៛, - បង្កងរស់ ១គ.ក្រ=១០០ ៛, - បង្កងងាប់ ១គ.ក្រ=៣០ ៛, ឯក្ដាមរស់=៤០ ៛, ចំណែកក្ដាមងាប់បានត្រឹមតែបោះចូលក្នុងធុងសំរាម ដូច្នេះ ចូរយើងទាំងអស់គ្នាត្រូវតែចេះស្រលាញ់ និងការពារ ព្រោះជីវិតវាមានតម្លៃណាស់ ៕

ដកស្រង់ពី ៖ មហាសំណើច

កុំតែបានពងទប់ ! ! !

February 15, 2007

ពីរនាក់ប្ដីប្រពន្ធបានប្រកបមុខរបររកស៊ីលក់ពងមាន់ពងទា (ស៊ុត) ដើម្បីចិញ្ចឹមជីវិត ចំណែកប្ដីរបស់គាត់វិញបានបែកគំនិតប្រកបមុខរបរផ្សេង ទុកមុខរបរចាស់ឱ្យប្រពន្ធរបស់គាត់ជំនួស ។ ការធ្វើជំនួញរបស់ប្ដីគាត់ត្រូវខាតបង់យ៉ាងច្រើន ។ គាប់ជួនថ្ងៃមួយ អ្នកជិតខាងបានមកលេងហើយសួរនាំពីការរកស៊ី ។

អ្នកជិតខាង : អឺយអ្នក! តើអ្នកជាមួយនឹងប្ដីរបស់អ្នកឯងនោះ វាយ៉ាងម៉េចដែរមើលទៅ?
ប្រពន្ធអ្នកជំនួញ : ណ្ហើយអ្នកអឺយ! រាល់ថ្ងៃនេះប្ដីរបស់ខ្ញុំ ដាក់ទៅលិចបាត់! ដាក់ទៅលិចបាត់! សព្វថ្ងៃនេះ កុំតែបានពងទប់នោះទេ កុំអីមិនដឹងជាទៅដល់ណានោះទេអ្នកអឺយ!!!

ដកស្រង់ពី ៖ មហាសំណើច

តើកូនជាសត្វអ្វី?

February 13, 2007

គូស្វាមីភរិយាមួយគូបានឈ្លោះប្រកែកទាស់ទែងគ្នា, បុរសជាប្ដីអត់ទ្រាំមិនបានក៏ស្រែកជេរប្រពន្ធយ៉ាងខ្លាំងថា ៖

ប្ដី : ឯងនេះល្ងង់ដូចគោអីចឹង!
ប្រពន្ធ : បងឯងក៏ដូចឆ្កែដែរ! ឮដូច្នោះ កូនរបស់គាត់ក៏បានសួរទៅម៉ាក់ប៉ាគេថា ៖
កូន : អីចឹង បើម៉ាក់ដូចគោ ហើយប៉ាដូចឆ្កែ, តើកូនជាសត្វអ្វីទៅម៉ាក់, ប៉ា!!!

ដកស្រង់ពី ៖ មហាសំណើច

ខ្លាចវាហោះបាត់

February 11, 2007

សង្ហា បាននាំស្រីស្នេហ៍ទៅញ៉ាំបាយនៅភោជនីយដ្ឋាន ។ សង្ហាក៏បានប្រាប់ទៅអ្នកបម្រើថា ៖

សង្ហា : យកម្ហូបសាច់ដែលឆ្ងាញ់មួយចាន ដែលមានតំលៃត្រឹមតែ ១០០០ រៀលបានហើយ! ពេលនោះអ្នកបម្រើលើកម្ហូបមកដល់ សង្ហា ព្រមទាំងស្រីស្នេហ៍ក៏សម្លឹងមើលម្ហូបក្នុងចានដោយមិនព្រិចភ្នែក ។ ឃើញដូច្នេះអ្នកបម្រើក៏សួរភ្លាម!
អ្នកបម្រើ : ហេតុអ្វីអ្នកទាំងពីរមិននាំគ្នាញ៉ាំទៅ?
គូស្នេហ៍ : សាច់នៅក្ដៅពេក!
អ្នកបម្រើ : ម្ដេចមិនឆាប់ផ្លុំវាឱ្យត្រជាក់ទៅ?
គូស្នេហ៍ : ខ្លាចវាខ្ទាតសាច់ចេញពីចានអស់!

ដកស្រង់ពី ៖ មហាសំណើច

ចោរចូលចិត្ត World Cup

February 10, 2007

ដោយឃើញម្ចាស់ផ្ទះកំពុងតែជក់ចិត្តមើលកម្មវិធីបាល់ទាត់ ( World Cup 2006 ) ក្នុងទូរទស្សន៍នោះ ចោរបានឱកាសក៏សរសៀរចូលលួចអូសម៉ូតូរបស់ម្ចាស់ផ្ទះ ដែលទុកចោលនៅជិតមាត់ទ្វារដោយថ្នមៗ ។ គាប់ជួនគ្រាប់បាល់កំពុងហើរចូលសំណាញ់ ១គ្រាប់ភ្លាម ចោរភ្លាត់មាត់ស្រែកអូ-ចូលមួយហើយ ។

ចោរ : ចូល១គ្រាប់ ល្អណាស់វ៉ើយ! ( រំពេចនោះ ក៏បានធ្វើឱ្យម្ចាស់ផ្ទះភ្ញាក់ក្រញាង )
ម្ចាស់ផ្ទះ : នោះ! ចោរលួចអូសម៉ូតូយើងហើយ!

ដកស្រង់ពី ៖ មហាសំណើច

ហួសពេលហើយប៉ា

February 8, 2007

ពេលកំពុងទទួលទានអាហារនៅក្នុងក្រុមគ្រួសារមួយ ឪពុកតែងទូន្មានដល់កូនៗមិនឱ្យនិយាយគ្នា នៅពេលញ៉ាំបាយព្រោះវាជាទម្លាប់មិនល្អ ។ ពេលកំពុងញ៉ាំបាយថ្ងៃត្រង់ ៖

កូន : ប៉ា! ប៉ា! មើល…!
ឪពុក : ញ៉ាំទៅកូន! កុំនិយាយច្រើនពេក វាមិនល្អទេកូន!

កូនៗក៏ឈប់និយាយបានត្រឹមតែសម្លឹងមុខឪពុក ។ លុះញ៉ាំរួចឪពុកក៏សួរទៅកូនថា ៖
ឪពុក : អើ! មុននេះកូនចង់និយាយអំពីអ្វី?
កូន : ជ្រុលពេលហើយប៉ាអើយ!
ឪពុក : ហេតុអ្វីទៅកូន?
កូន : កូនឃើញសត្វរុយ១ក្បាលនៅក្នុងចានបាយរបស់ប៉ាហើយប៉ាបានញ៉ាំវាបាត់ហើយ ។
ឪពុក : ថាម៉េច! ប៉ាហ្នឹង!

ដកស្រង់ពី ៖ មហាសំណើច

បុរសទាក់ទាញ

February 6, 2007

កាលពូប្រាជ្ញនៅកំលោះ មានស្រីក្រមុំស្អាតៗពីរនាក់ ម្នាក់ហ៊ានលះបង់ជីវិតដើម្បីរូបគាត់ ឯម្នាក់ទៀតសុខចិត្តរង់ចាំគាត់អស់មួយជីវិត … តើពួកនាងព្រមធ្វើអ្វីខ្លះដើម្បីគាត់?

ម្នាក់ថា : "បើអោយខ្ញុំរៀបការជាមួយលោក ខ្ញុំសុខចិត្តស្លាប់"

ឯម្នាក់ទៀតថា : "ចង់អោយខ្ញុំស្រលាញ់លោក ចាំជាតិក្រោយទៅចុះ…" ។

បុណ្យអុំទូក

February 5, 2007

នាយសយជាអ្នកទោសម្នាក់ដែលគោរពវិន័យហើយស្លូតបូតទៀងត្រង់ជាទីបំផុត ។ នៅថ្ងៃបុណ្យអុំទូកគាត់ក៏បានស្នើសុំអនុញ្ញាតិពីមេគុកដើម្បីចេញទៅនាំប្រពន្ធកូនដើរលេងម្ដង ។ មេគុកក៏យល់ព្រម : "យើងអោយឯងទៅ តែឯងដាច់ខាតត្រូវតែត្រឡប់មកវិញអោយបានមុនម៉ោងដប់យប់ ។" នាយសយបាននាំប្រពន្ធកូនដើរកំសាន្តនៅមាត់ទន្លេយ៉ាងសប្បាយក្រៃលែង ។ សំរាប់នាយសយនិងភរិយា ពេលវេលាដ៏មានសេចក្តីសុខបានកន្លងហួសទៅយ៉ាងលឿនជាទីបំផុត ។ ក្រឡេកមើលម៉ោងឃើញថាម៉ោង១២យប់បាត់ទៅហើយ! នាយសយប្រញាប់ប្រញាល់ត្រឡប់ទៅគុកវិញ ។ ពេលគាត់ទៅដល់គុកវិញ មេគុកអង្គុយនៅលើកៅអីទឹកមុខហាក់ដូចចង់ស៊ីសាច់មនុស្ស។ មេគុកស្រែកស្តីបន្ទោសខ្លាំងៗដាក់នាយសយថា : "លើកក្រោយបើមកយឺតទៀត អញឈប់ឱ្យចូលហើយវ៉ើយ!!!" ។

ដកស្រង់ពី ៖ មហាសំណើច

អត់អីតោង

February 4, 2007

ថ្ងៃអាទិត្យសំរាកពីការងារ ពូម៉េតនាំកូនប្រុសទៅលេងផ្សារសូរិយា ។ ពេលកំពុងតែឡើងជណ្តើរយន្តស្រាប់តែកូនគាត់ចំពប់ជើងរអិលពីលើជណ្តើរ តែសំណាងល្អ ភ្លាមនោះវាបានស្រវ៉ាចាប់ចំកន្លែងសំខាន់របស់ពុកវា ។ ពូម៉េតឈឺដែរ តែមិនដឹងបន្ទោសកូនយ៉ាងណា ។ គាត់ថា : "អាប្រុកហ្អែង! សំណាងហើយដែលមកជាមួយប៉ាប៉ា បើមកជាមួយម៉ាក់ឯងវិញ ច្បាស់ជាអត់អីតោងហើយ ។"

ដកស្រង់ពី ៖ មហាសំណើច

យមរាជចែកព្រលឹង

February 3, 2007

សុខ និង សាន អង្គុយចែកឃ្លីគ្នាមួយស្បោងនៅក្រោមដើមពោធិធំមួយនៅវាលបញ្ចុះសព ។ "អាមួយនេះឯង…អាមួយនេះអញ…ៗ…ៗ…" ពួកគេចែកបានពាក់កណ្តាលក៏មានឃ្លីពីរគ្រាប់ជ្រុះរមាលទៅកៀនរបង ។ សុខនិយាយ : "តោះចែកតទៀត ចាំចែករួចចាំទៅរើសវា ។" ពេលសុខ និង សានកំពុងបន្តចែកឃ្លីគ្នា ប្រុញជិះកង់កាត់របងវាលបញ្ចុះសពក៏លឺសំលេង "អាមួយនេះឯង…អាមួយនេះអញ…ៗ…ៗ…" តែមើលមិនឃើញសុខ និង សានដែលអង្គុយពីក្រោយដើមពោធិ ។ វាជិះវឹងទៅប្រាប់តាណាង : "តា!តា…យមរាជកំពុងតែចែកព្រលឹងគ្នាឱ្យលឿន ខ្ញុំនាំទៅមើល!" តាណាងកាន់ឈើច្រត់ធ្វើដំណើរត្រឹកៗទំរាំតែទៅដល់ ។ ពេលទៅដល់ តាណាងនិងប្រុញឈរកៀនរបងលបស្ដាប់ "អាមួយនេះឯង…អាមួយនេះអញ…ៗ…" តាណាងខ្សឹបប្រាប់ប្រុញថា : "អើ…ពិតជាពួកយមរាជកំពុងចែកព្រលឹងគ្នាមែន ។" ចំណែកឯសុខ និង សានវិញពេលពួកគេចែកឃ្លីអស់ពីស្បោងក៏និយាយថា : "តោះយើង ទៅរើសអាពីរគ្រាប់នៅកៀនរបង…លឺដូច្នេះ តាណាងបោះឈើច្រត់ចោលស្ទុះវឹង រត់ទៅដល់ភូមិមុនប្រុញដែលជិះកង់ទៅទៀត!! ។ emoticon

ដកស្រង់ពី ៖ មហាសំណើច

សិស្សពូកែ តែ…

February 2, 2007

ពិសិដ្ឋគឺជាសិស្សពូកែប្រចាំសាលាព្រះស៊ីសុវត្ថិ ។ ឆ្នាំនេះគេបានប្រលងជាប់លេខ១សិស្សពូកែគណិតវិទ្យាទូទាំងប្រទេស ។ ក្រោយពេលគោរពទង់ជាតិ លោកនាយកបានកាន់មេក្រូហៅឈ្មោះគេឡើងទទួលរង្វាន់ ។ លោកនាយកបានស្រែកហៅឈ្មោះពិសិដ្ឋជាច្រើនដងទំរាំឃើញគេធ្វើដំណើរមកយឺតៗ ។ លោកនាយកឆ្ងល់ក៏សួរ : "ប្អូនមិនបានលឺឈ្មោះទេឬ ម្តេចក៏យូរយ៉ាងនេះទើបឡើងមក?" "មិនមែនខ្ញុំមិនលឺឈ្មោះទេគឺខ្ញុំចង់ឱ្យសិស្សទាំងឡាយលឺឈ្មោះខ្ញុំបានច្បាស់បន្តិច ។" ពិសិដ្ឋឆ្លើយ ។

ដកស្រង់ពី ៖ មហាសំណើច

មាត់រឹង

February 1, 2007

ពូពៅគឺជាទាហាន ។ គាត់ចូលចិត្តដើរលេងជាមួយមិត្តភក្តិដល់យប់ជ្រៅទើបត្រឡប់មកផ្ទះ ។ ពេលគាត់មកដល់ផ្ទះយប់ពេក ប្រពន្ធគាត់មីងវ៉នតែងជេរស្ដីគាត់ខ្លាំងៗ លុះពូពៅទ្រាំមិនបានក៏ទាញកាំភ្លើងមកកាន់ប៉ូលាក្នុងលក្ខណៈគំរាមកំហែងទើបមីងវ៉នបាត់មាត់នៅស្ងៀម ។ ថ្ងៃមួយប្អូនស្រីមីងវ៉នមកស្នាក់នៅផ្ទះនេះបណ្តោះអាសន្ន ហើយបានឃើញពីសកម្មភាពរបស់ពូពៅចំពោះមីងវ៉ន ។ នាងសួរមីងវ៉ន : "ប្តីបងពិតជាកាចដល់ថ្នាក់ប្រពន្ធខ្លួនឯងក៏ហានបាញ់ផងហ្ន?" មីងវ៉នខ្លាចខ្មាស់ប្អូនក៏ឆ្លើយថា : "តាបេហ្នឹងម៉េចនឹងហានបាញ់បង បងឈប់ជេរស្ដីតទៀតគឺព្រោះតែខ្លាចគាត់បាញ់សំលាប់ខ្លួនទេតើ…" ។

ដកស្រង់ពី ៖ មហាសំណើច

M	T	W	T	F	S	S
« Jan				Mar »
			1	2	3	4
5	6	7	8	9	10	11
12	13	14	15	16	17	18
19	20	21	22	23	24	25
26	27	28