ពីមុនគេហៅថាតោ
គ្រួសារពូសនមានឆ្កែឆ្នើមមួយក្បាលដែលចូលចិត្តបបួលឆ្កែដទៃទៀតវ៉ៃគ្នាគ្រប់ទីកន្លែង ហើយវាឈ្នះគេរាល់លើក មិនថានៅក្នុងប្រទេសរឺនៅក្រៅប្រទេសទេ ។ ថ្ងៃមួយពូសនដឹកឆ្កែឆ្នើមនេះដើរនៅលើផ្លូវ ហើយបានឃើញពូសែមដឹកឆ្កែមួយក្បាលយ៉ាងធំរបស់គាត់ដើរលេងដែរ ពូសនគិតថា "ឆ្កែវាធំណាស់ បើសិនឆ្កែ ឆ្នើមរបស់យើងអាចយកឈ្នះឆ្កែរបស់វានោះប្រាកដជារឿងដ៏អស្ចារ្យហើយ បន្ទាប់មកគាត់ក៏ចូលទៅនិយាយជាមួយពូសែមថា : "តើលោកព្រមឱ្យឆ្កែរបស់លោកប្រកួតគ្នាជាមួយឆ្កែរបស់ខ្ញុំទេ?
ពូសែម : រឿងនេះៗ…………មិនល្អទេដឹង"
ពូសន : គ្មានបញ្ហាទេ ប្រសិនបើវាធ្វើឱ្យឆ្កែលោកត្រូវរបួស ខ្ញុំនឹងចេញថ្លៃព្យាបាលឱ្យ ។
ពូសែម : ខ្ញុំថានៅតែមិនល្អ ។
នៅពេលដែលពួកគេទាំងពីរនាក់កំពុងតែពិភាក្សាគ្នា សត្វទាំងពីរក្បាលនេះក៏ខាំគ្នា ទីបំផុត ឆ្កែឆ្នើមរបស់ពូសនចាញ់យ៉ាងដំណំ ។
ទឹកមុខរបស់ពូសនពោរពេញដោយកំហឹង គាត់បានសួរពូសែមថា "ឆ្កែឯងគឺជាពូជឆ្កែអី?"
ពូសែម : អាមួយនេះ នៅពេលគេមិនទាន់កោររោមរបស់វា គេគ្រប់គ្នាហៅវាថាសត្វតោ ។
ដកស្រង់ពី ៖ មហាសំណើច
