ម៉ុក និង ម៉ែន ជាសម្លាញ់នឹងគ្នា នឹង ជាអ្នកទេសចរណ៍មកពីទីក្រុងភ្នំពេញ ។
ពេលធ្វើដំណើរដល់ផ្លូវបំបែកចូលកន្លែងឆ្នេរកម្សាន្តក្រុងកែប ម៉ុកក៏បានឃើញសេះមួយយ៉ាងធំ… ។
- ម៉ុក ៖ យីសម្លាញ់ ! សេះអីក៏ធំម្ល៉េះ គ្នាអត់ដែលឃើញសោះ !
- ម៉ែន ៖ អឺ ! សេះនៅទីនេះអីក៏ធំម្ល៉េះហ្ន ! បានពូជមកពីណាធំជាងគេម្ល៉េះ ?
- អ្នករួមដំណើរ ៖ ឆ្កួតទេអ្ហី ! នេះជារូបចម្លាក់សេះស ពួកឯងអត់ដឹងទេអ្ហី ?
- ម៉ុក និង ម៉ែន ៖ ឡប់សតិ ! បើដឹងនរណាថា… ។
មីង ឆយ ជាអ្នករកស៊ីរបរលក់មឈូសខ្មោច ។ ជារៀងរាល់ព្រឹកបន្ទាប់ពីបោសសម្អាតរួច គាត់ក៏បានសែនកាហ្វេខ្មៅមួយពែង ហើយអុចធូបរួចបន់ខ្សឹបៗ ស្រាប់តែពេលនោះកូនពៅរបស់គាត់អាយុប្រហែល៨ឆ្នាំ ឆ្ងល់នឹងម្ដាយគេមិនដឹងបន់ថាម៉េចក៏សួរ ៖
- កូន ៖ ម៉ាក់ ! ម៉ាក់ ! តើម៉ាក់បន់ថាម៉េចខ្លះអម្បាញ់មិញ ?
- ម្ដាយ ៖ មានបន់ថាម៉េច គឺម៉ាក់បន់ថាអោយរកស៊ីលក់ដាច់អោយបានច្រើនព្រឹកនេះ… ។
- កូន ៖ អញ្ចឹងម៉ាក់បន់អោយគេងាប់ច្រើនណាស់មែនទេព្រឹកនេះ ?
- ម្ដាយ ៖ អាកូនភ្លើ ! បើមិនបន់អោយគេងាប់ច្រើន អញលក់ម៉េចនឹងដាច់… ។
ឆើតជាមន្ត្រីធំម្នាក់នៅក្រសួងមួយ គាត់មានប្រាក់កាសនិងមិត្តភ័ក្ដិជាច្រើន ហើយពួកគាត់តែងបបួលគ្នាដើរលេងស៊ីផឹកមិនសូវចូលផ្ទះទេ ទោះបីជាប្រពន្ធជេរស្ដីយ៉ាងណាក៏ដោយ ។ ល្ងាចមួយនៅពេលដែលឆើតមិនទាន់ទៅដើរលេង ប្រពន្ធក៏បាននិយាយទៅកាន់ប្ដីរបស់គាត់ថា ៖
- ប្រពន្ធ ៖ បងល្មមកែខ្លួនហើយខ្លួនបងចាស់ហើយ បើមិនខ្មាសញាតិក៏គួរខ្មាសកូនចៅដែរ… ។
- ឆើត ៖ យី ! នេះបានចំជាប្រពន្ធដ៏ល្អរបស់បងមែន ដឹងថាប្ដីចាស់ក៏អោយប្ដីកែខ្លួន មិនអីទេពីរ-បីថ្ងៃទៀត បងនឹងទៅភ្នំពេញអោយគេម៉ាស្សាមុខមាត់ស្បែក ធានាថាពិតជាស្អាតដូចកាលនៅពីកំលោះអញ្ចឹង ។
- ប្រពន្ធ ៖ ខ្ញុំអោយបងកែខ្លួនឈប់ដើរលេងយប់ទៀត មិនមែនអោយបងទៅម៉ាស្សាមុខមាត់ទេ… ។
- ឆើត ៖ អុញ ? ? ?
ថ្ងៃមួយ តាចឺម បានជួបនារីម្នាក់
- តាចឺម ៖ សួស្ដីនាង ! ខ្ញុំមានអាយុ ៥០ឆ្នាំហើយ ! ខ្ញុំចង់បាននាងធ្វើជាប្រពន្ធ ព្រោះខ្ញុំឃើញនាងសុភាពគួរអោយស្រលាញ់ ហើយរឿងទ្រព្យសម្បត្តិនាងកុំព្រួយខ្ញុំមានមិនខ្វះទេ ។ នាងគិតយ៉ាងណាដែរ ?
- នារីនោះតប ៖ ខ្ញុំមិនស្រលាញ់ទេ !
- តាចឺម ៖ អូ៎ នែច្រឡំទេ ! ខ្ញុំមានអាយុទើបតែ ៣៨ឆ្នាំប៉ុណ្ណោះ
- នារីម្នាក់នោះ ៖ ថាម៉េច ? ជ្រុះសក់អស់រលីងហើយបាក់ធ្មេញអស់ទៀត ទើបតែអាយុ ៣៨ឆ្នាំ ! ខ្ញុំមិនស្រលាញ់ទេ !
- តាចឺម ៖ ណ្ហើយ ! បើនាងមិនព្រមស្រលាញ់ខ្ញុំ ហើយខ្ញុំប្រាប់នាងតាមត្រង់ទៅចុះ ខ្ញុំនេះមានអាយុ ៨០ឆ្នាំហើយ ។
- នារីនោះ ៖ អូ៎ ! យូរហើយមិនប្រាប់តាមត្រង់ បើអាយុប៉ុណ្ណឹងខ្ញុំព្រមស្រលាញ់ហើយ ហើយបើសិនអាយុកាន់តែច្រើនជាងនេះរឹតតែស្រលាញ់ខ្លាំងជាងនេះទៀត ។
នៅក្នុងថ្នាក់រៀនមួយ គ្រូបាននិយាយទៅកាន់សិស្ស ៖
- លំហាត់ដែលអ្នកគ្រូបានដាក់ឲ្យធ្វើនៅផ្ទះនោះ ឯងធ្វើមិនត្រូវទេ ឯងនេះមិនយកចិត្តទុកដាក់ក្នុងការសិក្សាសោះ អ្នកគ្រូនឹងផ្ដល់ព័ត៌មានឲ្យឪពុក-ម្ដាយរបស់ឯងបានដឹង ។ សិស្សបានតបទៅអ្នកគ្រូរបស់ខ្លួនវិញ ៖
- អ្នកគ្រូធ្វើដូច្នេះ ប៉ាខ្ញុំច្បាស់ជាមិនពេញចិត្តទេ !
អ្នកគ្រូឆ្លើយតបវិញ ៖
- គ្មានរឿងអ្វីដែលឪពុកឯងមិនពេញចិត្តទេ ! ពុកឯងនឹងទូន្មានឯងព្រោះឯងធ្វើលំហាត់មិនយកចិត្តទុកដាក់ !
- សិស្សតប ៖ ប៉ាខ្ញុំច្បាស់ជាមិនពេញចិត្តអ្នកគ្រូ អ្នកគ្រូដឹងទេថាលំហាត់នេះប៉ាខ្ញុំជាអ្នកធ្វើឲ្យខ្ញុំ ព្រោះខ្ញុំធ្វើមិនចេញ ។
- អ្នកគ្រូ ៖ អុញ….!?!?
Cloggers Summit
ម៉ោងស្រុកខ្មែរ ៖