ជម្រាបសួរ!
ខ្ញុំឈ្មោះ ចន្ត្រា (Chantra) គោលបំណងនៃការបង្កើតកំណត់ហេតុបណ្ដាញនេះគឺដើម្បីលើកស្ទួយភាសាខ្មែរ ជាមួយនឹងការប្រើប្រាស់ពុម្ពអក្សរខ្មែរយូនីកូដ ព្រោះថាបើយើងចង់បង្កើតកំណត់ហេតុបណ្ដាញជាភាសាខ្មែរបាន លុះត្រាតែយើងប្រើប្រាស់យូនីកូដខ្មែរទើបអាចបង្កើតបាន។
ខ្ញុំបានបញ្ចប់បរិញ្ញាប័ត្រផ្នែកព័ត៌មានវិទ្យា នៅសកលវិទ្យាល័យន័រតុនតាំងពីឆ្នាំ ២០០២មកម្លេះ។ ខ្ញុំជាអ្នកមកពីខេត្តបន្ទាយមានជ័យទេ មិនមែនជាអ្នកទីក្រុងឡើយ ហើយសព្វថ្ងៃនេះនៅនិយាយភាសាអ្នកភ្នំពេញមិនទាន់ត្រូវផង។ ខ្ញុំទើបតែស្គាល់កំណត់ហេតុបណ្ដាញបានជាង១ឆ្នាំប៉ុណ្ណោះ ។ សូមបញ្ជាក់ថាកំណត់ហេតុបណ្ដាញពិតជាមានសារៈសំខាន់ និង ភាពងាយស្រួលមែនសម្រាប់អ្នកដែលមិនសូវមានចំណេះដឹងផ្នែកបច្ចេកវិទ្យាព័ត៌មានវិទ្យា គឺពួកគេអាចបង្កើតកំណត់ហេតុបណ្ដាញផ្ទាល់ខ្លួនបានក្នុងរវាងតែប៉ុន្មាននាទីប៉ុណ្ណោះ ហើយអាចបង្កើតបានទាំងកំណត់ហេតុបណ្ដាញភាសាខ្មែរ និងភាសាផ្សេងៗទៀត។
ខ្ញុំជ្រើសកំណត់ហេតុបណ្ដាញនេះដើម្បីបង្កើតជាកំណត់ហេតុបណ្ដាញរឿងកំប្លែង ព្រោះខ្ញុំគិតថាវាអាចផ្ដល់ភាពសប្បាយរីករាយ រំសាយទុកកង្វល់បានមួយគ្រាៗក្នុងកំឡុងពេលមានស្ត្រេសដែលបណ្ដាលមកពីការងារផ្សេងៗ ឬការពិបាកចិត្ត និងការស្មុគស្មាញផ្សេងៗ ។ល។ តែទោះជាយ៉ាងណារឿងកំប្លែងទាំងអស់នេះគឺខ្ញុំគ្មានជំនាញក្នុងការបង្កើតរឿងដោយខ្លួនឯងទេ គឺខ្ញុំគ្រាន់តែប្រមូលរឿងកំប្លែងទាំងនេះពីប្រភពផ្សេងៗប៉ុណ្ណោះ ហើយខ្ញុំក៏សូមអភ័យទោសដល់អ្នកដែលបានបង្កើតរឿងទាំងអស់នេះឡើងផងដែរដែលខ្ញុំពុំបានសុំការអនុញ្ញាតិជាមុន ក្នុងការបញ្ចូលរឿងនេះទៅក្នុងកំណត់ហេតុបណ្ដាញរបស់ខ្ញុំ។ ការពិតទៅខ្ញុំពុំបានយករឿងទាំងនេះមកធ្វើជាអាជីវកម្មអ្វីដែរ គ្រាន់តែប្រមូលទុកជាឯកសារសម្រាប់មនុស្សគ្រប់រូបចូលអានកំសាន្តតែប៉ុណ្ណោះ ណាមួយចង់លើកស្ទួយពុម្ពអក្សរខ្មែរយូនីកូដក្នុងបណ្ដាញអ៊ីនធឺណិតផងដែរ ជាពិសេសគឺចូលរួមជួយលើកស្ទួយអក្សរសាស្ត្រជាតិខ្មែរ។
សូមអរគុណយ៉ាងជ្រាលជ្រៅចំពោះលោកអ្នកទាំងអស់គ្នាដែលបានចូលមកកាន់កំណត់ហេតុបណ្តាញនេះ សម្រាប់ទស្សនាកំសាន្តរឿងកំប្លែងផ្សេងៗ។ ខ្ញុំរីករាយនឹងទទួលការផ្តល់យោបល់នានាអំពីលោកអ្នកអានជានិច្ច។
បេ ចន្រ្តា
